蓄深心动留红线盒逞利口谢却七香车
罗子富正要朱蔼人摆庄，忽听得黄二姐低声叫“罗老爷”。子富不及豁拳，丢下便走。黄二姐在外间迎着，道：“阿要金凤来替耐豁两拳？”子富点点头，黄二姐遂进房到台面上去。子富自过对过房间里，只见黄翠凤独自一个坐在桌子傍边高椅上，面前放着那一对金钏臂。翠凤见子富近前，笑说：“来。”揣住子富的手捺到榻床坐下，说道：“倪无(女每)上耐当水，听仔耐闲话，快活得来！我就晓得耐是不过说说罢哉。耐有蒋月琴来哚，陆里肯来照应倪？倪无(女每)还拿仔铡臂来拨我看。我说：‘钏臂末啥稀奇，蒋月琴哚勿晓得送仔几花哉！就是倪也有两副来里，才放来哚用勿着，要得来做啥？’耐原拿仔转去罢。隔两日，耐真个蒋月琴搭勿去仔，想着要来照应倪，再送拨我正好。”
子富听了，如一瓢冷水兜头浇下，随即分辨道：“我说过蒋月琴搭定规勿去哉。耐勿相信末，我明朝就教朋友去搭我开消局帐，阿好？”翠凤道：“耐开消仔，原好去个（口宛）。耐搭蒋月琴是老相好，做仔四五年哉，俚哚也蛮要好。耐故歇末说勿去哉，耐要去起来，我阿好勿许耐去？”子富道：“说仔勿去，阿好再去嗄？说闲话勿是放屁。”翠凤道：“随便耐去说啥，我匆相信晚耐自家去想，耐末就说是勿去，俚哚阿要到耐公馆里来请耐嗄？俚要问耐，阿有啥得罪仔耐了动气，耐搭俚说啥？阿好意思说倪教耐（要勿）去嗄？”子富道：“俚请我，我匆去，俚阿有啥法子？”翠凤道：“耐倒说得写意哚。耐勿去，俚哚就罢哉。俚定归要拉耐去，耐阿有啥法子？”子富自己筹度一回，乃问道：“价末耐说要我那价？”翠凤道：“我说，耐要好末，要耐到倪搭来住两个月，耐勿许一干仔出门口。耐要到陆里，我搭耐一淘去。蒋月琴哚也匆好到倪搭来请耐。耐说阿好？”子富道：“我有几花公事哚，陆里能够匆出门口？”翠凤道：“勿然末，耐去拿个凭据来拨我。我拿仔耐凭据，也匆怕耐到蒋月琴搭去哉。”子富道：“故阿好写啥凭据嗄？”翠凤道：“写来哚凭据，阿有啥用场！耐要拿几样要紧物事来放来里，故末好算凭据。”子富道：“要紧物事，不过是洋钱（口宛）。”翠凤冷笑道：“耐看出倪来啥邱得来！阿是倪要想头耐洋钱嗄？耐末拿洋钱算好物事，倪倒无啥要紧。”子富道：“价末啥物事？”翠凤道：“耐（要勿）猜仔倪要耐啥物事。倪也为耐算计，不过拿耐物事来放来里，倘忙耐要到蒋月琴搭去末，想着有物事来哚我手里，耐也匆敢去哉，也好死仔耐一条心。耐想阿是？”
子富忽然想起，道：“有来里哉，坎坎拿得来个拜匣，倒是要紧物事。”翠凤道：“就是拜匣蛮好，耐放来里仔阿放心？我先搭耐说一声，耐到蒋月琴搭去仔一埭，我要拿出耐拜匣里物事来，一把火烧光个。”子富吐舌摇头道：“阿唷，利害哚！”翠凤笑道：“耐说我利害，耐也识差仔人哉！我做末做仔个倌人，要拿洋钱来买我倒买勿动。（要勿）说啥耐一对钏臂哉，就摆好仔十对钏臂，也匆来里我眼睛里。耐个钏臂，耐原拿得去。耐要送拨我，随便陆里一日送末哉。今夜头倒（要勿）拨来耐看轻仔，好像是倪看中仔耐钏臂。”一面说，一面向桌上取那一对金钏臂，亲自替子富套在手上。子富不好再强，只得依他，道：“价末原放来哚拜匣里，隔两日再送拨耐也无啥。不过拜匣里有几张栈单庄票，有辰光要用着末，那价？”翠凤道：“耐用着末，拿得去末哉。就匆是栈单庄票，倘忙有用着个辰光，耐也好来拿个（口宛）。到底原是耐个物事，阿伯倪吃没仔了？”子富复沉吟一回，道：“我要问耐，耐为啥钏臂是勿要？”翠凤笑道：“耐陆里猜得着我意思。耐要晓得做仔我，耐（要勿）看重来哚洋钱浪。我要用着洋钱个辰光，就要仔耐一千八百，也算勿得啥多；我用勿着，就一厘一毫也匆来搭耐要。耐要送物事，送仔我钏臂，我不过见个情；耐就去拿仔一块砖头来送拨我，我倒也见耐个情。耐摸着仔我脾气末好哉。”
子富听到这里，不禁大惊失色，站起身来道：“耐个人倒稀奇哚！”遂向翠凤深深作揖下去，道：“我今朝真真佩服仔耐哉。”翠凤忙低声喝住，笑道：“耐阿怕难为情嗄？拨俚哚来看见仔，算啥？”说着，仍揣住子富的手，说：“倪对过去罢。”挈至房门口，即推子富先行，翠凤随后，同向台面上来。
那时出局已散。黄二姐正帮着金凤等张罗，望见子富，报说：“罗老爷来哉。”朱蔼人道：“倪要吃稀饭哉，耐坎坎来。”子富道：“再豁两拳。”陶云甫道：“耐末倒有趣去，倪搭蔼人吃仔几花酒哚。”子富带笑而告失陪之罪，随叫拿稀饭来。席间如何吃得下，不过意思而已。
当时席散，各自兴辞。子富送至楼梯边，见杨啸庵在后，因想着说道：“我有点小事体，托耐去办办。明朝碰头仔再搭耐说。”啸庵应诺。等到陶云甫、朱蔼人轿子出门，然后汤啸庵步行而归。
罗子富回到房间里，外场已撤去台面，赵家(女每)把笤帚略扫几帚，和小阿宝收拾了茶碗出去。子富随意闲坐，看翠凤卸头面。须臾，黄二姐复进房与子富闲谈。翠凤便令取出那只拜匣来，交与子富。子富乃褪下钏臂，放在拜匣里。黄二姐不解何故，两只眼汩油油的，看看子富，看看翠凤。翠凤也不理他，子富照旧锁好。翠凤又令黄二姐将拜匣去放在后面官箱里。黄二姐才自明白，捧了拜匣要走，却回头问子富道：“耐轿子阿教俚哚打转去？”子富道：“耐去喊高升来。”黄二姐乃去喊了高升上楼。子富吩咐些说话，叫高升随轿子回公馆去了。随后小阿空来请翠凤对过房间里去。
翠凤将行，见房里只剩子富一个，即问：“珠凤呢？”小阿宝道：“无(女每)教俚哚团去哉。”翠凤看挂钟，已敲过四点，方不言语，便向楼窗口高声喊道：“耐哚人才到仔陆里去哉！”赵家(女每)在楼下，连忙接应，一径来见子富，问道：“罗老爷，安置罢？”子富点点头。于是赵家(女每)铺床吹灯，掩门退出。子富直等到翠凤归房安睡。一宿无话。
子富醒来，见红日满窗，天色尚早。小阿宝正拿抹布揩拭橱箱桌椅，也不知翠凤那里去了。听得当中间声响，大约在窗下早妆。再要睡时，却睡不着。一会儿，翠凤梳好头，进房开橱脱换衣裳。子富遂坐起来，着衣下床。翠凤道：“再困歇，十点钟还勿曾到。”子富道：“耐起来仔啥辰光哉？”翠凤笑道：“我因勿着哉呀，七点多钟就起来哉。耐正来哚（目忽）头里。”
赵家(女每)听见子富起身，伺候洗脸、刷牙、漱口。随问点心子富说：“勿想吃。”翠凤道：“停歇吃饭罢。”赵家(女每)道：‘冷饭还有歇哪。”子富道：“等歇正好。”翠凤道：“教俚哚赶紧点。”赵家(女每)承命去说。子富复叫住，问：“高升阿曾来？”赵家(女每)道：“来仔歇哉。我去喊得来。”高升闻唤，见了子富，呈上字条一张，洋钱一卷，问：“阿要打轿子？”子富道：“今朝礼拜，无啥事体，轿子勿要哉。”因转问翠凤：“倪去坐马车阿好？”翠凤道：“好个。倪要坐两把车哚。”子富也不则声，再看那张条子，乃是当晚洪善卿请至周双珠家吃酒的，即随手撩下。高升见没甚吩咐，亦遂退去。